काठमाडौँ (भदौ ११) – सम्माननीय उपराष्ट्रपति श्री रामसहाय प्रसाद यादवज्यूले रसुवाको भोटेकोशी नदीमा भदौ १० गते आएको भीषण बाढीका कारण ठूलो जनधनको क्षति भएकोप्रति गहिरो दुःख व्यक्त गर्दै पीडित नागरिकको तत्काल उद्धार, खोज तथा राहत कार्यमा सहयोगार्थ आफ्नो एक महिनाको पारिश्रमिक प्रदान गर्ने घोषणा गर्नुभएको छ । उपराष्ट्रपतिज्यूले सो सहयोग रकम ‘प्रधानमन्त्री विपद् उद्धार कोष’मा जम्मा गर्ने निर्णय गर्नुभएको हो ।
भोटेकोशीमा आकस्मिक बाढीका कारण रसुवा, नुवाकोट, धादिङलगायतका जिल्लामा ठूलो जनधनको क्षति भएको दुःखद समाचारले आफू अत्यन्तै दुःखित र चिन्तित बनेको उपराष्ट्रपति यादवले जारी गर्नुभएको विज्ञप्तिमा उल्लेख छ ।
'यस विपत्तिमा अकालमै ज्यान गुमाउनु भएका नेपाली नागरिक, विदेशी पर्यटक तथा तीर्थयात्रीहरुप्रति भावपूर्ण श्रद्धाञ्जली अर्पण गर्दै दिवंगत आत्माहरूको चिरशान्तिको कामना गर्दछु'विज्ञप्तिमा छ,'आफ्ना प्रियजन गुमाउनु भएका परिवारजनप्रति गहिरो समवेदना र हार्दिक सहानुभूति व्यक्त गर्दछु। विपत्तीमा परेकाहरुको उद्धार, बेपत्ता भएकाहरुको खोजी तथा घाइतेहरुको शीघ्र स्वास्थ्यलाभको कामना गर्दछु । घाइतेहरुको यथोचित उपचारका लागि सम्बन्धीत सबैमा हार्दिक आग्रह गर्दछु । '
उहाँले बाढीबाट प्रभावितहरुको उद्धार र सहयोगका लागि सरकार र सुरक्षाकर्मीहरु सक्रियताका साथ लागि परेका उल्लेख गर्दै यस कठिन घडीमा सम्पूर्ण नेपालीहरु एकजुट भई अकल्पनीय विपत्तीको सामना गर्न र आ–आफ्नो स्तरबाट हरसम्भव सहयोग गर्न आग्रह गर्नुभएको छ ।
'यस कठिन घडीमा सम्पूर्ण नेपालीहरू एकजुट भई विपत्तीको सामना गर्न र आ–आफ्नो स्तरबाट सहयोग गर्न आग्रह गर्दछु 'विज्ञप्तिमा छ,'हामी एक–अर्काको सहारा र सहयोगी बन्नु नै हाम्रो सामूहिक कर्तव्य हो ।'
No comments:
Post a Comment