अश्कलाई गणपति देवी सम्मान

वर्ष २०७८ को 'गणपति देवी सेवा सम्मान' साहित्य सर्जक गोपाल अश्कलाई प्रदान गरिएको छ । उनी दुई दशक भन्दा बढी समययता भोजपुरी, नेपाली र हिन्दी भाषामा सामानान्तर रूपमा साहित्य सृजनामा सक्रिय छन् । गोरखापत्रका पूर्व प्रधान सम्पादक सीताराम अग्रहरिले आफ्नी आमा गणपति देवीकाे स्मृतिमा स्थापना गरेको उक्त सेवा सम्मानबाट यो वर्ष अश्क सम्मानित भएका हुन् ।

खुट्टामा चाेट लागि स्वास्थ्य लाभ गरिरहेका अश्कलाई उनको निवासमै पुगेर गणपति देवी सेवा सम्मान समितिको सह-संयाेजक मधुदेवी अग्रहरिले शाल ओढाएर सम्मान गरेकी हुन । अग्रहरिले दस हजार सय रुपैयाँकाे चेक पनि अश्कलाई सम्मान स्वरुप हस्तान्तरण हस्तान्तरण गरिन् ।

साे अवसरमा समितिका संयाेजक सीताराम अग्रहरिले आफू पत्रकार, साहित्यकार केही हैन आमाकाे कृपाले नै शब्द र सेवा महिमा सिकेकाे स्मरण गरे । अश्ककाे साहित्यिक देनकाे चर्चा गर्दै संयोजक अग्रहरिले सेवा हि परमाे धर्म लेखिएको सम्मानपत्र पढेर सुनाए ।

जवाफमा अश्कले आमाका नाममा प्राप्त पुरस्कार आफ्नो लागि प्रसादस्वरुप भएकाे टिप्पणी गरे । अश्ककी पुत्री पूजा शर्राफले भनिन्,' हामीले बा'काे कविता ध्यानले सुने/नसुने पनि हामीलाई थाहा छ, बा'के हुनुहुन्छ । ' माघ शुक्ल एकादशी अग्रहरिकी माताकाे पुण्य तिथि हाे। गणपति देवीका दुई पुत्र, दुई पुत्री छन् ।