मधेसी परेनन् राजदूतको सिफारिसमा

मधेस केन्द्रित दल राजपाको महन्थ–राजेन्द्र गुटको समर्थनबाट सरकार जोगाउन सफल प्रधानमन्त्री केपी शर्मा ओली नेतृत्वको सरकारले विभिन्न ११ देशमा राजदूत नियुक्तिको सिफारिस गरेको सार्वजनिक गरेको छ । बैशाख ३१ मा मात्रै पुनर्नियुक्त परराष्ट्रमन्त्री प्रदीप ज्ञवालीले साताअघिकै मन्त्रिपरिषद्ले राजदूतको नाम सिफारिस गरेको जानकारी दिंदै प्रस्तावित नाम संसदीय सचिवालयमा पठाइएको बताएका छन् । यो सिफारिसमा मधेसी, दलित, थारु, अल्पसंख्यकसहितका समुदाय परेका छैनन् । सिफारिसका लागि पठाइएको सूची हेर्दा ११ मध्ये आठ जना खसआर्य÷पहाडे ब्राह्मण (७२ दशमलव ७३ प्रतिशत), पहाडे जनजाति २ जना (१८ दशमलव १८ प्रतिशत) र मुस्लिम एक जना (९ दशमलव ०९ प्रतिशत) रहेको छ । यसमा एक जना महिला मात्र परेका छन् । कान्तिपुरमा देवेन्द्र भट्टराई लेख्छन्, ‘प्रस्तावित राजदूतको नाम संसदीय सुनुवाइबाट पारित भएपछि बढीमा एक महिनाभित्र राजदूत नियुक्ति प्रक्रिया अघि बढ्छ ।’ अब प्रश्न छ के महन्थ–राजेन्द्र गुटले यो सरकार समक्ष मधेसीसहितका समुदायको समावेशिताका लागि आबाज उठाउन सक्लान त ?