सम्माननीय उपराष्ट्रपति यादवसंग युएईका राजदूत शम्सीको शिष्टाचार भेट

सम्माननीय उपराष्ट्रपति श्री रामसहाय प्रसाद यादवज्यूसंग नेपालका लागि संयुक्त अरब इमिरेट्स (युएई) का महामहिम राजदूत अब्दुल्ला अल शम्सीले मंगलबार लैनचौरस्थित उपराष्ट्रपतिको कार्यालयमा शिष्टाचार भेटवार्ता गर्नुभएको छ ।

भेटमा शुभकामना आदानप्रदान पश्चात द्विपक्षीय सम्बन्ध, श्रम र आर्थिक सम्बन्ध लगायतका विषयमा छलफल भयो । सम्माननीय उपराष्ट्रपति यादवले नेपाल र संयुक्त अरब इमिरेट्सबीच सन् १९७७ मा कूटनीतिक सम्बन्ध स्थापना भएदेखि नै असल एवं मित्रवत सम्बन्ध रही आएकोमा सन्तोष व्यक्त गर्दै भन्नुभयो, ‘दुई मित्रवत देशबीचको उच्चस्तरीय भ्रमण आदानप्रदानले एकआपसमा सहकार्यका लागि थप अवसरहरु प्रदान गर्दै आएको छ ।’

उहाँले युएईको ५३औं राष्ट्रिय दिवसको उपलक्ष्यमा हार्दिक शुभकामना दिँदै हालै ‘फ्लाई दुबई’ ले गौतमबु्द्ध विमानस्थलमा सिधा उडान सुचारु गरेकोमा हार्दिक धन्यवाद दिनुभयो । साथै ‘एयर अरेबिया’ विमानसेवाको समेत उडान संचालन गर्न महामहिम राजदूतको समन्वय तथा सहकार्यका लागि उहाँले अनुरोध गर्नुभयो ।

उपराष्ट्रपति यादवले नेपाल सरकारको गौतम बुद्ध अन्तर्राष्ट्रिय विमानस्थल र पोखरा अन्तर्राष्ट्रिय विमानस्थलमा सञ्चालन हुने एयरलाइन्सलाई १६ सेप्टेम्बर, २०२६ सम्मका लागि शुल्क र राजस्वमा छूट प्रदान गरी प्रोत्साहन गर्ने निर्णयबारे जानकारी समेत दिनुभयो । ‘भैरहवा तथा पोखराबाट वैदेशिक रोजगारीका लागि सोझै युएई प्रस्थान गर्ने नेपाली नागरिकहरुले भिषा आवेदन गर्न उपरोक्त स्थानहरुमा भिसा सेन्टर स्थापना गर्ने तर्फ संयुक्त अरब इमिरेट्स सरकारले आवश्यक कदम चाल्नेछ भन्ने अपेक्षा नेपाल सरकारले गरेको छ ’ उहाँले भन्नुभयो।

उपराष्ट्रपति यादवले ठूलो संख्यामा नेपालीहरुलाई रोजगारीको अवसर उपलब्ध गराएकोमा युएई सरकारको प्रशंसा गर्दै नेपालले युएईको मानव संसाधनको आवश्यकता पूर्तिमा योगदान पुर्याएको विश्वास व्यक्त गनुभयो । ‘नेपाल आफ्ना नागरिकका लागि सुरक्षित र सम्मानजनक वैदेशिक रोजगारी उपलब्ध गराउन प्रतिबद्ध छ ’ उहाँले भन्नुभयो, ‘ नेपाल सरकारले क्रमशः अर्धदक्ष र दक्ष जनशक्ति समेत युएईको श्रम बजारमा पठाउने कार्यलाई प्राथमिकता दिएको छ ।’

उपराष्ट्रपति यादवले नेपाल अति कम विकसित मुलुकको सूचीबाट सन् २०२६ सम्ममा स्तरोन्नती हुने लक्ष्यका साथ अघि बढेकोले यस स्तरोन्नतीलाई दिगो, अपरिवर्तनीय र सहज बनाउन आवश्यक रहेकोमा यसका लागि युएई लगायत अन्य मित्रराष्ट्रहरुको साथ सहयोग र सद्भावको खाँचो रहेको बताउनुभयो । ‘हाम्रा दुई देशबीच व्यापार, पर्यटन, लगानी लगायत विभिन्न क्षेत्रमा सहयोग र सहकार्य अभिवृद्धिको लागि प्रचुर सम्भावना छ,’ उहाँले भन्नुभयो, ‘नेपाल र युएईले खासगरी संयुक्त राष्ट्रसंघ, जी–७७ र असंलग्न आन्दोलनजस्ता अन्तर्राष्टिय र बहुपक्षीय मञ्चहरुमा सहकार्य बढाउँदै लगेको छ । आगामी दिनमा त्यस प्रकारको सहकार्यको सम्बन्ध अझ घनिभूत हुँदैजाने विश्वास व्यक्त गर्दछु ।’

संयुक्त अरब इमिरेट्सका महामहिम राजदूत अब्दुल्ला अल शम्सीले नेपाली जनताको सेवाका लागि युएई सदैव तयार रहेको उल्लेख गर्दै नेपालको विभिन्न आयोजना र क्षेत्रहरुमा सहयोग गर्न समेत ईच्छुक रहेको बताउनुभयो । ‘गौतमबु्द्ध विमानस्थलमा सिधा उडान सुचारु गर्न एयर अरेबियासंग कुराकानी भै रहेको छ । आशा छ, त्यसले पनि उडान गर्ने छ ’ राजदूत शम्सीले भन्नुभयो, ‘ युएईले विभिन्न अन्तर्राष्ट्रिय मञ्चमा नेपालको समर्थन गर्न चाहन्छ ।’