कार्यवाहक राष्ट्रपति यादवद्वारा महिला क्रिकेट टोलीलाई ऐतिहासिक विजयमा हार्दिक बधाई

कार्यवाहक राष्ट्रपति रामसहाय प्रसाद यादवले युनाइटेड अरब इमिरेट्स (यूएई) मा भइरहेको आईसीसी यू–१९ महिला ट्वान्टी–२० विश्वकपको एसिया छनौटको निर्णायक खेलमा नेपालले यूएईलाई हराउँदै नेपाली महिला क्रिकेट टोलीले ऐतिहासिक विजय हासिल गरी विश्वकप–२०२५ मा छनौट भएकोमा बधाई दिनुभएको छ ।

उहाँले बधाई सन्देश मार्फत् खेलाडीहरू, प्रशिक्षकहरू तथा सम्बन्धित पदाधिकारीहरूलाई हार्दिक बधाई दिनुभएको हो । ‘खेलको क्रममा नेपाली खेलाडीहरूले देखाउनुभएको दक्षता, धैर्यता, दृढ संकल्प, समर्पण, लगनशीलता, अनुशासन र उत्कृष्ट प्रदर्शनको म मुक्त कण्ठले प्रशंसा गर्न चाहन्छु’ उपराष्ट्रपतिको कार्यालयबाट जारी विज्ञप्तिमा छ, ‘भविष्यमा पनि यस्तै उत्कृष्ट प्रदर्शन गर्दै उहाँहरूले नेपाल र नेपालीको शीर उच्च राख्नुहुनेछ भन्ने विश्वास व्यक्त गर्दै आगामी प्रतियोगिताहरूको लागि पनि शुभकामना व्यक्त गर्न चाहन्छु ।’