देउवा फेरी भाग्यशाली !

एमाओवादी सुप्रिमो तथा पूर्व प्रधानमन्त्री पुष्पकमल दाहाल ‘प्रचण्ड’ को भारत भ्रमण लगतै नेपाली कांग्रेसका नेता तथा पूर्व प्रधानमन्त्री शेरबहादुर देउवाको नयाँ दिल्ली भ्रमण सम्पन्न भएको छ । भ्रमणका क्रममा दुवै नेताहरुलाई भारतले अगामी संविधानमा सबैलाई समेटेर जान आग्रह गरेको छ । संविधानको प्रस्तावित मस्यौदा सार्वजनिक भएलगतै विभिन्न वर्ग, समुदायबाट कडा आलोचना भइरहेकै बेला र अगामी संविधान जारी गर्ने समयसीमा समेत प्रमुख चार दलले तोकिसकेको अवस्थामा प्रचण्ड र देउवाको भ्रमणलाई अर्थपूर्ण रुपमा हेरिएको छ । संविधान निर्माण प्रतिक्रिया सम्पन्न भइसकेपछि सत्ता परिवर्तन समेत हुने बताइरहेको अवस्थामा भारतले पूर्व प्रधानमन्त्रीहरुलाई एकपछि अर्को गर्दै दिल्ली वार्ताका लागि बोलाउनुमा धेरै कुरा लुकेको छ । यसमा भारतको चाहना र स्वार्थ पनि देखिन्छ । स्रोतका अनुसार भारतले आफू अनूकूलको संविधान वा त्यसमा आफ्नो भूमिका के रहने भन्ने स्पेस खोजिरहेकाले यी पछिल्लो भ्रमणहरु शुरु भएका हुन् । पूर्व प्रधानमन्त्री देउवाको भारत भ्रमणबारे त्यहाँको मिडियाले खासै स्थान दिएको पाइएन । पीटीआई, एएनआई, जी न्युजलगायतका केही संचारमाध्यम बाहेक देउवाको भ्रमणले महत्व पाएन । ती संचार माध्यमहरुले पनि देउवाबाट भारतीय प्रधानमन्त्रीलाई भूकम्प लगतै गरेको सहयोगको प्रशंसा बाहेक केही उल्लेख छैन । जी न्युजले अन्तर्वाता छापेपनि त्यसमा देउवालाई भारतको पक्षमा हुने विषय वस्तुहरुलाई मात्रै स्थान दिएको छ । तर, नेपाली संचार माध्यमहरुले भने विभिन्न स्रोतहरुलाई उदृत गर्दै प्रकाशित गरेको समाचारमा भने नेपाली राष्ट्रियताको कुरा जोडदार रुपमा उनले गरेको उल्लेख छ । तर साउथ ब्लकका स्रोतले भने सरकार परिवर्तन भए अगामी नेतृत्व देउवालाई दिने तयारी भइरहेको छ । कांग्रेस नेता देउवालाई अमेरिका, युरोपेली युनियनसहित भारतको पनि समर्थन रहेको बुझिएको छ । ‘१६ बूंदे सम्झौतापछि केपी शर्मा ओली प्रधानमन्त्री बन्ने प्रायः निश्चित भइसकेको अवस्थामा एमाले र कांग्रेसबीचको सहमति उल्टयाउने खेल शुरु भएको छ ’स्रोतले भन्यो, ‘ १६ बूंदे सम्झौता नेपालका नेताहरुको मौलिक भएकाले त्यसलाई साउथ ब्लकले स्वीकारेको अवस्था छैन, नेपालमा ओलीलाई मधेस विरोधका रुपमा ब्रिफ नयाँ दिल्लीमा गरिएकाले उनको प्रधानमन्त्री बन्ने सम्भावना न्युन भएको छ । ’ आइतबार मात्रै एमालेले प्रधानमन्त्री सुशिल कोइरलालाई सत्ता हस्तान्तरण गर्न नचाहेको आरोप लगाएलगतै कोइरालाले आफूमाथि विश्वास गर्नु पर्ने प्रतिक्रिया दिएका थिए । यसैबीच कांग्रेसले धोका दिन सक्ने सम्भावना बढ्दै गएपछि एमाले र एमाओवादीबीच सत्ता साझेदारीको कुरो समेत चल्न थालेको छ । यसका लागि पहल समेत शुरु भइसकेको बताइएको छ । स्रोतले भन्यो, ‘केपी शर्मा ओली प्रधानमन्त्री बनेपनि उनको अवस्था झलनाथ खनालको जस्तै हुने निश्चित छ । ’